कलि गडे माय्वल

कलि गडे माय्वडा वोड्कि अरुस्वल गोस्टि
मरट पोरो सूड्तेके दिस्वल हाबर अनि अद हाबडल दिहतुन रोपो माकुन वेड्चि अनि गर्मि सीसेर बस्केट गिर मंवल पोड्द। रातुन वेड्चि सीसेर मंवल नेलेंज, मिन्क-मिन्क मिड्चेर हाबडगा दिस्वलिक सुकुक बहन निव्डे मासि मंदनुंग? बोर निव्डि कीसि मंदनिर इंवल गोस्टि नीकुन बस्केन वाता कि? इव पोड्द नेलेंज अनि सुकुकुन हिंदल उंदि दिवोस। अद दिवोसुन रोपो उंदि रात अनि उंदि दिहा। वार्दुन येडुंग रोज्क, साल्दुन बारा महिनंग, साल्दुन रोपो मूंद कालम्क इतेके येद्दि-गालुम, पिर-गालुम अनि पीनि-गालुम बहन निव्डे मातंग? इव सम्दोन इंके बोर ताकुसेर मंतोर?
अह्ने मरट मंवल इचोर डगुर दर्तुरित अनि अद दर्तुरित पोरो पिसेर मंवलिक पियंग-काल्क, पुर्ग-बुसि, पिटे-पुरड, केडता जिव्रस अनि येत रोपो मंवल जिव्रस। इव सम्दो जिव्रस बहन निव्डे मासि मंदर? असल बोर निव्डि कीसि मंदनुर?
मरट दर्तुरित पोरो पिसि मंले, इद मेंदोल अवना पीटे बोर तयर कीसि मंदनुर? इद मेंदोडुन रोपो माकुन जीवा बोन्गटल वासि मंदर? कलि सूडन साटि कड्क, सवद सूडन साटि वेंजेर, केंजन साटि केव्क, काम्क कियन साटि केय्क अनि काल्क, सोंच विचर कियन साटि बुदि-गियंता आत्मा बोर मावा मेंदोडुन रोपो इर्सि मंदनुर?
असल माय्नलिरा पुट-गड्मि बहन आसेर मंता?
इव सम्दो सवल्कुन बारेते चोकोट करि कीका इन्कि ते इद पुस्तक पूरो मोदोडल ते आक्रि वेरि दिहंते चोकोट वाचि कीमु।