मार्कना चोकोट्ना कबुर

परिचयम्: मुने वेह्वल गोस्टि
इद पुस्तक्नगा बगवंतनोर मरि येसु किरिस्तु जग्दुनियतोर नरिमन्कन साटि बतल बहन कीतोर इन्वडुन बारेते लिहि कीसि मंता। इद सम्दो वेसुडि इंकेडा इज्रयेल देस्नगा तोले करल-करल जर्ग्ता। इद पुस्तकुन किरिस्तु सकम 42 तल 44 साल वेरि मार्क इंवल वोरोर लिहि कीतोर।
इदेनगा वोर येसु केतड बूत्कुन पोरो अदिकार वाले आसि वेल्लेटिर लोकुर्गटल अवेन टेंड्सि पूड्तोर अनि वूर्कुन चोकोट कीतोर। अह्ने बच्विरो येड्कि-दुक्ने मंवलिर्कुन, गुड्डि गूनलिर्कुन चोकोट कीतोर।
येसु लेका सेले अचोंग उंडे दुस्रोक अद्बुत अनि मय्मतंग कार्वय्क गिर कीतोर। सियुंग हजर्क मांदितुन सियुंग सारिने पेट्टिमेन जेवुन सिय्वल. सातुर्कुन नेंडुस्वल, येतुन पोरो ताक्वल इहिन वेल्ले कार्वय्क कीतोर।
इव सम्दो सूड्सि वेल्लेटिर लोकुर वोर येसु वेह्वल बोदा केंजन साटि इच्चा कींदिर। वोर तना “नरिमन्कनोर तादन” इंजेर वेह्चि, सिरिप बगवंतले किया पर्वलिक कार्वय्क कींदुर। इदेन हिंदल यूदुल्क्नुर डगुक अदिकारिर वोर येसुन पोरो कपट्ने मंजि, “वोना पीडा टेंड्सि पूडन” इंजेर बस्केट गिर सूड्सेर मंदिर। अहन आक्रित वूर अदिकारिर पगा पिय्सि बय्मन ते मंजि वोन जक्तेर।
वेल्लेटिर डगुक लोकुर “वोन बगवंतनोर मरि” इंजेर वोप्तेर। आक्रितुन येसु मोद्ना सिलुवत पोरो मार्ता पेजे अव सम्दो मुने मंजि सूड्तोर सिपायिरोर कमंडर गिर “वेर करलेने बगवंतनोर मरि” इंजेर वोप्तोर। इंके इद पुस्तक वाचि कीनेके निमे “वोर येसु बोर आंदुर?” इंजेर इंद्का इंतियो मंदगा सोंच कीम।
असल वोर येसु दर्तुरित पोरो बहन पिस्तोर? बतल-बतल कीतोर? मोद्नगा मोलने पासि टांगि कीसि, वोन जक्ता पेजे मूंद रोज्क्ने बहन नेंड्तोर? तिरिसि सिंगर दीप्नगा सोंजि तंवोर बाबो बगवंतन संगा उच्चि कलितुन बहन ताकुसेर मंतोर?
इंके चोकोट्ना कबुर बतल इतेके बगवंतल मा सम्दिर्कुन वेल्ले मयते सूड्सेर मंतोर। तंवोर मरि येसुना मरंतुन हिंदल माकुन मुक्ति सिय्ले वोन सारि कीतोर। इदेन हिंदल बोर-बोर्ते पर्जा बगवंतन पोरो बरोसा इर्सि वोना आरदना कींतेरो वूर्कुन बस्केट गिर मन्वल सिंगर दीप्ना मुक्ति पुटंता इन्वडुन बारेते इद पुस्तक्नगा लिहि कीसि मंता।