रूतु

मोदोल वाचि किय्वल गोस्टि
इद कलित रोपो तम्वंग कार्वय्क पूरि कियन साटि, यूदा जातितुर्कुने आय्वा दुस्रो जातितुर्कुन गिर बगवंतल बहन वाडकम कींतोरो इज्रयेल जातितुर करि कियना इंजेर इद रूतु इन्वल पुस्तक्नगा लिहि कीसि मंता। रूतु इंवल वेय्लो मोयब देस्ना आंदु, इज्रयेल देस्ना आयो। पोसटि वेय्लो आता अद नयोमिना चोकोट वायुट सूडन साटि रूतु तम्वा पर्जतुन सुटि कीसि, इज्रयेल देस्नगा वांता। इज्रयेल देस्नोर दाविद राजल अनि वोनुर तोत्तुर्कुन इद रूतु बहन अवल आसि निल्तयो, इद कततगा लिहि कीसि मंता।
इद कततुन वाचि कियन मुने इद गोस्टि करि कीम्ट।
तोल्ले इज्रयेल देस्नगा यूदा जातितुन रोपो उंदि नियम मत्ता। बतल इतेके कुटुंबतगा इविर मर्क्मंजि डगुर मरि मर्मिंग आसि मार्तेके, सेर्न्डु तंगेन तुंग्सि, तादना आस्तितुन पोरो अदिकार वाले आंतोर। उंडे वूर्कुन मरि-मियड जल्मा आतेके, अद आस्ति मर्क्ना आंता. उंदि मोका वोरोरे मंजि मार्तेके, अद आस्ति करुम्नोर पालेवांडन आंता। बोर्ते वोना कुटुंबतल उंडे गिर पिसि मंदंतेरो, वूर सम्दिरा चोकोट वायुट सूड्वल जिमेदारि वोर पालेवांडन पोरो मंदंता।
इद पुस्तक्नल करिवलिक गोस्टिंग
बगवंतनंग इच्चंग नंमा परुर अहन पूरे माय्वल।
बरोसते पिस्वलिर हिंदल बगवंतल तंवंग कार्वय्क पूरि किय्वल।
दुस्रुर्कुन मदत किय्वडुन हिंदल, कुटुंबमुन पोरो, दोस्तलिर पोरो बरोसा इर्वडुन हिंदल, वूरा पिस्वल तरिका मार्युसि, बगवंतल वूर्कुन आनंद सिय्वल।
बगवंतना चोकोट-पान सिरिप यूदुल्कुन साटिने आयो बति सम्दि जातिनुर साटि मंता।
बगवंतल जग्दुनियता पर्जतुन चोकोट सूड्वल अनि वूरा पिस्वडुन रोपो तम्वंग कार्वय्क पूरि किय्वल आंदुर।